އެންމެންނަށް މީރު ބަޓާ ޗިކަން އުފަންވީ ކިހިނެއް؟

Read Time:4 Minute, 50 Second

އެންމެ ގިނަ ބަޔަކަށް މީރު އިންޑިއާގެ ރަހައަކީ ބަޓާ ޗިކަން އޭ ބުނުމަކީ ދޮގަކަށް ނުވާނެ އެވެ. މިއީ 1920ގެ އަހަރުތަކުގެ ތެރޭގައި ’އަންޑިވައިޑެޑް އިންޑިއާ‘ ނުވަތަ އިންޑިއާ އާއި ޕާކިސްތާނަކީ ވަކި ދެ ގައުމެއްގެ ގޮތުގައި ކަނޑަނާޅާ ދުވަސްވަރު އުފަންވި ޑިޝްއެއްގެ ބަޔެކެވެ.

ބަޓަ ޗިކަން އަސްލަކަށް ބަލައިގެން އެއާ އެއްގޮތް އިތުރު ރަހަތައް ވެސް ވަނީ އުފަންވެފަ އެވެ. އޭގެ ތެރޭގައި މަސް ނުކާ މީހުންނަށް ނުވަތަ ވެޖްޓޭރިއަނުންނަށް ކުކުޅުގެ ބަދަލުގައި ޕަނީރު އަޅައިގެން ހަމަ މި ޑިޝް ތައްޔާރުކުރެ އެވެ.

ތާރީހަށް ބަލާއިރު، ބަޓާޗިކަން އުފަންވުމުގެ ފުރަތަމަ މަރުހަލާ ފެށުނީ އަންޑިވައިޑެޑް އިންޑިއާގެ ޕިޝާވަރުގައި ހިންގި ކުޑަ ރެސްޓޯރެންޓެއްގައެވެ.ޕިޝާވަރަކީ މިހާރު ޕާކިސްތާނުގެ ބަޔެކެވެ.

އެތައް ލައްކަ ބަޔެއްގެ އެންމެ ފޭވަރިޓް މި ޑިޝް އުފެދުނީ ވެސް ’އެކްސްޕެރިމެންޓެއް‘ ކުރަން އުޅުމުގެ ތެރޭގަ އެވެ. އެގޮތުން ރެސްޓޯރެންޓުގެ ޝެފްގެ ގޮތުގައި މަސައްކަތް ކުރި ކުންދަން ލާލް ގުޖުރާލް، ކުކުޅުގައި މިރުހާއެކު ޔޯގަޓް އުނގުޅާ މެރިނޭޓުކޮށް އުފެއްދި ތަންދޫރީ ޗިކަންގެ ނުވިކި ހުންނަން ފެށި ބައި، ޓޮމާޓޯ އާއި ބަޓަރު އަޅައިގެން ކައްކާ ގްރޭވީ އެއްގެ ތެރެއަށް އަޅައި މަހުގައި އެ ގްރޭވީގެ ރަހަ ލެއްވީ އެވެ.

ޝެފަށް އެނގިގެން ވިޔަސް ނޫނީ އޮޅިގެން ވިޔަސް، އުފެއްދުނީ ދުނިޔޭގެ އެކި ހިސާބުތަކުގައި ހިންގާ އިންޑިއަން ރެސްޓޯރެންޓުތަކުގެ މެނޫގައި އެންމެ ހިނގާ ޑިޝް އެވެ. ބަޓާ ޗިކަން އުފަންވީ، އިންޑިއާ އާއި ޕާކިސްތާނު ބައިވި ފަހުން، ޝެފް ކުންދަން މަސައްކަތްކުރި ރެސްޓޯރެންޓު ’މޯތީ މަހަލް‘ ގެ ބަދިގޭގައި 1950ގެ އަހަރުތަކުގެ ތެރޭގަ އެވެ.

މޯތީ މަހަލް އަކީ މިހާރު ދުނިޔޭގައި މަގުބޫލު ރެސްޓޯރެންޓު ބްރޭންޑެކެވެ. ކޮވިޑުގެ ކުރިން ރާއްޖޭގައި ވެސް މޯތީ މަހަލްގެ ރެސްޓޯރެންޓެއް ހުޅުވި އެވެ.

ޝެފް ކުންދަންގެ ކާފަ ދަރިފުޅު ވަނީ އެ އާއިލާގެ ރަހަތަކުގެ އަސްލު ނުގެއްލޭނެހެން ގިނަ ބަޔަކަށް ގެނެސްދިނުމަށް ’ދަރްޔަންގް‘ ގެ ނަމުގައި ރެސްޓޯރެންޓު ހިންގަން ފަށައިފަ އެވެ.

ބަޓާޗިކަން އުފަންވިތާ އަދި އެއް ގަރުނު ވެސް ހަމަނުވެ އެވެ. އެކަމަކު މިއީ އެތައް ލައްކަ ބަޔެއްގެ އެންމެ މަގުބޫލު ކެއުމެވެ. ބަޓާ ޗިކަން އަކީ ތައްޔާރު ކުރަން ވެސް މާ އުނދަގޫ ޑިޝްއެއް ނޫނެވެ.

ލޮނުރަހަ ހެޔޮވަރުކޮށް، މިރުހާއި ޔޯގަޓު އަޅައިގެން މެރިނޭޓުކޮށް ފިހާ ކުކުޅު، ފިޔާ އަދި ޓޮމާޓޯ ބަޓަރުގައި ކައްކައިގެން ހަދާ ގްރޭވީގައި ތައްޔާރުކުރާ މި ޑިޝް ނާން އަދި ބަތާއެކު ވެސް މީރެވެ. ބައެއް މީހުންނަށް ތަންކޮޅެއް ކުޅިކޮށް ކަމުދާއިރު، ހުތްރަހަ އާއެކު ކުޑަ ފޮނި ރަހައެއް ބަޓާ ޗިކަބްގައި ހުރުމުން އެ ކަމުދާ މީހުން ވެސް އުޅެ އެވެ.