ގައްބަރޭ ހިމެނޭހެން އިތުރު ބަޔަކަށް ޕީޖީ އޮފީހުން ދައުވާ ކޮށްފި

Read Time:2 Minute, 35 Second

މަތިވެރި ދާއިރާގެ ރައްޔިތުން މަޖިލީހުގެ އެމްޑީޕީ މެންބަރު ޙަސަން ޒަރީރަށް ހަމަލާދީ އަވަހާރަކޮށްލަން އުޅުނު މައްސަލައިގައި އިބްރާހީމް ޢަބްދުﷲ (ގައްބަރޭ) ހިމެނޭހެން އިތުރު ބަޔަކަށް ޕްރޮސެކިއުޓަރ ޖެނެރަލް އޮފީހުން ދައުވާ ކޮށްފިއެވެ.

މިމައްސަލައިގައި ދައުވާ ކޮށްފައިވަނީ ކ. މާލެ/ މއ. ނައިޓްވިލާ، އިބްރާހީމް ޢަބްދުﷲ (ގައްބަރޭ)ގެ އިތުރުން މ.ތާޖް، މުލާއިމް މުހައްމަދު އަދި ތ. ކިނބިދޫ، ދީފުރަމްގެ، އަހުމަދު އަވްޝަމްގެ މައްޗަށެވެ.ޕްރޮސެކިއުޓަރ ޖެނެރަލް އޮފީހުން ވިދާޅުވީ، މެއި މަހުގެ އެއްވަނަ ދުވަހުގެ މެންދަމުގެ ވަގުތެއްގައި، މާލޭގައި ހިންގާ، ”ހަބީބީ“ ކެފޭތެރޭގައި، ރައްޔިތުންގެ މަޖިލީހުގެ މެމްބަރު ޙަސަން ޒަރީރަށް ނުރައްކާތެރި ހަތިޔާރާއި، ތޫނު ހަތިޔާރު ބޭނުންކޮށްގެން ހަމަލާދީ، މާރާމާރީ ހިންގި މައްސަލައިގައި ދަޢުވާ ކުރުމަށް މިދިޔަ މަހުގެ 19 ވަނަ ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.

ޕީޖީ އޮފީހުން ވިދާޅުވީ، ގައްބަރޭގެ މައްޗަށް ކޮށްފައިވަނީ ބިރުދެއްކުމާއި، ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 8 ވަނަ މާއްދާގެ ދަށުން، މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ ކަމަށެވެ. ދެން ތިބި ދެ މީހުންގެ މައްޗަށް ކޮށްފައިވަނީ އެ މާދާގެ ދަށުން މާރަމާރީ ހިންގުމުގައި ބައިވެރިވުމުގެ ދައުވާއެވެ.